ភ្នំពេញ៖ កំណាត់ផ្លូវជាតិលេខ៧៦ ត្រង់ចំនុចបាក់ស្រុតកាលអំឡុងក្នុងភូមសាស្រ្តស្រុកអូររាំង ខែត្តមណ្ឌលគីរី ត្រូវស្ថាបនាឡើងវិញរួចរាល់ជាស្ថាពរ និងត្រៀមដាក់ឲ្យដំណើរការឆាប់ៗ។

មន្ទីរសាធារណការ និងដឹកជញ្ជូនខេត្តមណ្ឌលគីរី បានឱ្យដឹងថា ក្រោមការយកចិត្តទុកដាក់ពីសំណាក់ប្រមុខរាជរដ្ឋាភិបាលនៃកម្ពុជា ដើម្បីដោះស្រាយការលំបាករបស់ប្រជាពលរដ្ឋ ក្នុងការចរាចរណ៏ប្រចាំថ្ងៃ ជាពិសេសដល់ រដូវដឹកជញ្ជូនកសិផលនានា កំណាត់ផ្លូវជាតិលេខ៧៦ ដែលរងការបាក់ស្រុតនារដូវវស្សា ខែសីហា ឆ្នាំ២០២៣ កន្លងមក ត្រូវស្ថាបនារួចរាល់ជាស្ថាពរ និងត្រៀមដាក់ឲ្យដំណើរការនាពេលខាងមុខ។

ជាមួយគ្នានេះ ប្រធានមន្ទីរសារធារណការ និងដឹកជញ្ជូនខេត្តមណ្ឌលគិរី លោក រស់ គីមធន បានបន្តថា ក្រុមការងារបានធ្វើការស្រោចកៅស៊ូ រោយថ្មទំហំ ១៩មម រួចទាំងស្រុងហើយ លើកំណាត់ ផ្លូវជាតិលេខ៧៦ ប្រវែង ៤២៥ (PK93+900 to PK94+325) ដើម្បីតភ្ជាប់ឡើងវិញ ជំនួសផ្លូវជាតិលេខ៧៦ ដែលបានរអិលស្រុតចុះកាលពីយប់ថ្ងៃទី០១ សីហា ២០២៣ កន្លងមកនោះ។

គួរឱ្យដឹងដែរថា ផ្លូវជាតិលេខ ៧៦ ចំណុចអូរងើយ ភូមិអណ្ដូងក្រឡឹង សង្កាត់សែនមនោរម្យ ស្រុកអូររាំង ខេត្តមណ្ឌលគិរី បានបាក់ស្រុតចុះ និងខូចទាំងស្រុង មិនអាចធ្វើដំណើរបានសម្រាប់ ដោយសារជំនន់ទឹកភ្លៀងបានកាត់ផ្តាច់ផ្លូវ កាលពីថ្ងៃទី១ ខែសីហា ឆ្នាំ២០២៣៕